Rom 15 | PONPDN | STEP | A MAK eta, kitail kelail akan, en sauasa me luet akan, ap der peren ki pein kitail.

Romans 15

1 A MAK eta, kitail kelail akan, en sauasa me luet akan, ap der peren ki pein kitail. 2 Amen amen kitail en pok on men impa, pwen kamauiala i. 3 Pwe Kristus pil sota kin pok on pein i, a duen intinidier: Pakainak en me kainaki komui, me I dikidier raui. 4 Pwe karos me intinidier mas o, me intinidier, pwen padaki don kitail, pweki kanonama o kamait en kisin likau kan kitail en kaporopor. 5 Ari, Kot en kanonama o kamait en kaminimin komail pena duen Kristus Iesus. 6 Pwe komail en kalinanada Kot o Sam en atail Kaun Iesus Kristus ni lamalam ta pot o au ta ieu. 7 I me komail en apapwali pena dueta Kristus me kotin kasamo komail on linan en Kot. 8 Pwe nai inda, me Iesus Kristus wialar papan sirkomsais pweki melel en Kot, pwen kapwaiada inau kan on sam akan. 9 Pwe men liki kan en kalinanada Kot pweki a mak duen a intinidier: I me I pan kadedede komui ren men liki kan o kauleki mar omui. 10 O pil eu me a kotin masan i: En popol komail men liki kan ianaki sapwilim a aramas! 11 O pil eu: Kapina Kaun o, komail men liki kan karos o kalinanada i, komail wei karos! 12 O pil eu me Iesaia masani: Ip en Iese pan pwarado, a pan pwarado, pwen kaunda men liki kan, i me men liki kan pan kaporoporeki. 13 Ari, Kot en kaporopor en kadire kin komail peren o popol karos ni poson, pwe omail kaporopor en laudeki manaman en Nen saraui. 14 A nai asa mau duen komail ri ai kan, me komail dir en kamau o audaudeki erpit, o koiokki on panapanaui pena amen amen. 15 Ari so, ri ai kan, i intin won komail er duen met, pwen kataman kin komail mak eu, me Kot kotiki on ia er. 16 Pwe i en papan Kristus Iesus on men liki kan, padapadaki won ir ronamau en Kot, pwe men liki en wiala mairon eu, me konekon, me kasaraui kila Nen saraui. 17 I me i kak suaiki pan Kristus Iesus pweki meakan me sapwilim en Kot. 18 Pwe i sota pori on inda meakot, me Kristus sota kotiki on ia, i en kalua men liki on peik, ki ai padak o wiawia kan. 19 O kilel o manaman akan, en Nen saraui. Ari, i me i kadire kila ronamau en Kristus sap karos, tapiada Ierusalem, ap lel on Ilirien. 20 Nai nantion ni ai padaki ronamau wasa me saikenta asa duen Kristus pwe i de kauada pon pason en amen. 21 A duen a intinidier: Me saik kalok on irail pan kilan, o me sota ron, re pan weweki. 22 Nan i me karompwa ia pan pak toto, pwen sota kak pwar won komail. 23 A met solar wasan dodok ni sap pukat, a par toto me i inon ion en pai won komail. 24 I lao sailokelan Spanien, i pan pwar won komail, pwe i kaporoporeki, me i pan sup wasa o ap kilan komail, a komail pan kalua ia lan wasa o murin ai kaserloleit re omail. 25 A met i pan sailokelan Ierusalem, pwen papa saraui kan. 26 Pwe men Masetonien o Akaia kan mauki kisakisa wei on saraui samama kan, me mi Ierusalem. 27 Irail mauki pwe re pil pwaipwand on irail, pwe ma men liki kan pwaisanekier arail pai nenin, nan me kon on, irail en pakisakis don irail ar pai pali war. 28 I lao kapwaiadar mepukat oki on irail er kisakis sapan wet, I ap pan sup re omail o daululan Spanien. 29 A i asadar, i lao pwaralan komail, i pan dir pai ki en Kristus. 30 A ri ai kan, i ap poeki komail pan atail Kaun Iesus Kristus o limpok en Nen pwe komail en dauki pena on ia omail kapakap kin ia on Kot. 31 Pwe i en piti san men Iudaa soposon akan, o pwe ai dodok on Ierusalem en sauasa saraui kan. 32 Pwe i en perenki lel on komail pan kupur en Kot o ian komail tapwenda. 33 Ari, Kot en popol en kotikot re omail karos! Amen.